اج سک متراں دی ودھیری اے
کیوں دلڑی اداس گھنیری اے
لوں لوں وچ شوق چنگیری اے
اج نیناں لائیاں کیوں جھڑیاں

.مکھ چند بدر شاہ شانی اے
متھے چمکدی لاٹ نورانی اے
کالی زلف تے اکھ مستانی اے
مخمور اکھیں ہن مدھ بھریاں

دو ابرو قوس مثال دِسن
جے تھی نوکِ مژاں دے تیرچھُٹن

لباں سرخ آکھاں کہ لعلِ یمن
چٹے دند موتی دیاں ہن لڑیاں

اے صورت شالا پیشِ نظر
رہوے وقتِ نزع تے روزِ حشر
وچ قبر تے پُل تھی جد ہو سی گزر
سب کھوٹیاں تھی سن صد کھریاں

حجرے تھی مسجد آؤ ڈھولن
من بھاونی جھلک دکھاؤ مٹھن
تے اُو ہاں مٹھیاں گالیاں لاؤ مٹھن
جیہڑیاں حمرا وادی سن کریاں

سبحان اللہ ما اجمَلَکَ
ما احسَنَکَ ما اکمَلَکَ
کیتھے مہر علی کیتھے تیری ثنا
گستاخ اکھیاں کیتھے جا لڑیاں